Руски теметов у Сримскей Митровици ше находзи у сиверовосточней часци городу на жеми хтору подаровал парохияан Михалько.
Там уж 1901 .року поховани перши парохиянє. На руским теметове ше находзи и каплїца Покрова Пресвятей Богородици, чийо фундаменти пошвецел и почал будовац о.Илия Ґарапич, а будованє закончел 1938.року Теодор Ференц.
У крипти поховани члени фамелиї Ференц. У рамикох руского теметова ше находзи Назаренски и Євангелистични лутерански теметов.
Нєдалєко од восточней часци каплїчки поховани пейцме грекокатолїцки паноцове: Илия Ванчик (1884-1949), Владимир Сеґеди (1894-1929), Миле Ґолубич (1857-1938), Михайло Гирйовати (1883-1962), декан сримски, и Марко Малич паноцец зоз Бачинцох хтори умар у сримскомитровицким шпиталю 1918.року и ту є поховани.
Такой коло каплїчки поховани члени руских фамелийох: Абодї, Беднар, Бесерминї, Ванчик, Веселчин, Ґрабаня, Желем, Манько, Прокоп, Страценски, Трудич, Годоба, Цундра.
Посмертни остатки умартих Руснацох поховани на исти способ як и посмертни остатки Сербох ( зоз твару обрацену на восток и з крижом при глави). На Руским теметове єст коло сто надгробни памятнїки,даскелїх найстарших у целовим и шивим мраморе по моди с конца XIX и початку XX вику, по даскельо гробни памятнїки зоз периоду медзи двома шветовима войнами.
Презвиска похованих шлїдуюци: Русин, Шкрпан, Джуня, Лукач, Рац. Ту и памятнїк забитей седемнацрочней дзивки Єли Цундра зоз 1938.року, хтору забил леґинь за хторого ше нє сцела одац. Єст и коло двацец памятнїки з новшого периоду хтори своїм покойним справели члени руских фамелийох у городзе.
Їх презвиска шлїдуюци: Абодї, Беднар, Бесерминї, Ванчик, Велики, Веселчин, Ґрабаня, Желем, Манько, Прокоп, Страценски, Трудич, Годоба, Цундра. Руски и два сушедни теметови Назаренски и Євангелистични нєшка отримую роботнїки Комуналного городского подприємства.
1995.року принєшена одлука зоз хтору до 2015. року стари городски теметови заварти за хованє. Спрам спомнутей одлуки, у Сримскей Митровици ше престало ховац на старих городских теметовох, односно допущене ховац лєм гевти особи хтори маю место, т.є. фамелийне гробне место або крипту.
У Сримскей Митровици єст вецей теметови, як цо на приклад Православни и Католїцки, на хторих поховани и члени руских фамелийох. 1980.року основани нови Городски теметов, на хторим ше вєдно хова припаднїкох шицких националних и вирских заєднїицох Сримскей Митровици.
Лїляна Радуловачки
Владимир Балащак
