Иснує єдна красна и байковита леґенда о походзеню назви малого места у Бачкей, Коцура. По народней приповедки и преданю, у тим месце жили вельи красни дзивки, хтори були векшином дзивки тутейших рибарох. Кед ше леґинє зоз околних местох рихтали нащивиц их, опитали ше им: “Дзе идзеце?”, а вони одвитовли: “Код цура”. Предпоставя ше же тот одвит “Ко(д) цура”, часом и зоз гласову пременку прешол до сербскей назви Куцура, або по руски – Коцур.
Дворска комора Австроугорскей монархиї була задовольна зоз колонистами Руснацами населєним у Руским Керестуре, та послала Петра Киша зоз Керестура до сиверних часцох царства, до жупанийох Боршод, Абауй, Земплин и Саболч, же би там вербовал Руснацох хтори би ше доселєли до Коцура, под условийом же би були “Liberae migrationis”, рускей народносци, грекокатолїцкого виросповиданя, способни за польски роботи.
Обецане им же у Коцуре достаню простор за хижи, же можу тримац свойо богослуженє, же достаню достаточно жеми и пустару Стуб.
У условийох стало же Руснаци муша сами себе будовац хижи по упутству коморского спахилука, з валькох або цегли, та же окрем жеми достаню два роки ошлєбодзеня од порциї и полрочно право на карчму.
Истого 1763. року до Коцура пришла 41 фамелия, а два роки познєйше стигли ище 42 фамелиї.
Записи зоз церковних кнїжкох у Мучоню, у Мадярскей, потвердзую же вельке число Руснацох до Коцура пришло зоз тей парохиї.
Нєшка, после Руского Керестура, друге место по числу населєних Руснацох у Войводини Коцур.
У месту ше находза три церкви, католїцка хтора пошвецена Шицким Святим, православна и грекокатолїцка (хтора найстарша), а обидва пошвецени Уцпению Пресвятей Богородици, єдно з найвекших християнских шветох.
По преданю, Богородица ше на тот дзень вознєсла на нєбо и “предала свой дух до рукох Спашителя”.
Церква коцурских Руснацох пошвецена Успению, подпада под надлєжносц Керстурскей епархиї, а походзи зоз другей половки 18. вику.
По свом стилу припада “панонскому бароку”.
Перша грекокатолїцка церква у Коцуре збудована 1765. року, такой по насельованю перших руских приселєнцох.
Єй нукашньосц могла прияц до 300 особи и нє мала нїяки уметнїцки вредносци.
Турню нє мала, алє место турнї подзвигнута дзвонярня з древених гредох зоз дзвоном од 50 килоґрами.
Була пошвецена Покрову Пресвятей Богородици.
Уж после трох рокох, як число Руснацох росло, церква поставала цесна.
- року поставени фундаменти новей церкви, а тота подїя описана у перших сербских новинох “Сербския новини” . (Беч, число 79, од 1. октобра 1792. року)
Вибудов церкви хтора и нєшка активна дошлєбодзела Царица Мария Терезия и о тим видала ришенє 8. юлия 1780. року. Тото ришенє потвердзел и єй син Йозеф II, 1786. року.
Церква збудована о трошку дворскей комори 1795. року.
Гоч фундаменти поставени 1792. року, пре войну хтори монархия водзела, будованє длуґо тирвало.
Главни проєктант бул је Йосип-Йожеф Киш (1748-1813), познати мадярски гидротехнїчни инжинєр, идейни творац, проєктант и перши будователь Велького Бачкого каналу.
По його дїлох и визийох свою роботу засновали познєйши будователє гидросистеми Дунай – Тиса – Дунай.
Главни будователь бул Франциско Фриц, а Лука Шостерич бул представнїк Угорскей дворскей комори и будовательни руководитель.
Богослуженя ше отримовали у старей церкви покля ше нова знука нє зредзела.
Арсениє Теодорович, сербски маляр, прави представнїк першей епохи 19. вика, перши майстор зоз вельку роботню, творац класичней школи, намальовал иконостас церкви у Коцуре, а резбариї на иконостасу зробел Йохан Штайнгаузер, склуптор и иконорезач зоз Зомбору.
Року 1813. иконостас поставени, а Владика Константин Станич нову церкву , пошвецену Успению Пресвятей Богородици пошвецел 1820. року.
Церква длугока 33,2 метери, широка 13,7 метери, знука є висока 11 метери, а турня висока 47,2 метери.
Пред церкву ше находзи криж од червеного мрамору, хтори поставени 1872. року.
Храм бул оправяни и мальовани даскельо раз.
Перше пременєн патос од цеглох, а 1843. року поставени камени патос.
Нукашньосц храма омальована 1910. року, а помедзи 1920. и 1923. набавени и поставени три церковни дзвони.
Нови мраморни престол подзвигнути 1939. року.
Академски маляр Лазар Микулич намальовал вельки малюнок Царици-Богородици 1959. року и поставел святилїще.
Будованє церковней сали у порти церкви започате је 1989. року.
Салу прикрашую три малюнки академскей малярки по походзеню зоз Коцура Серафими Пушкаш Стойшич.
Фундаменти парохиялного дома пошвецел Владика Славомир Миклош 1998. року, а будованє закончене концом 2000. року.
Зоз своїм мишаним и рижнородним жительством Коцур мирне и приятно войвођанске место, зоз шицкима условиями за пристойни живот.
През валал чече беґель Дунай-Тиса-Дунай, а зоз обудва боки беґелю на Шлайсу находза ше одлични места за лапац рибу, купац ше, зредзени мол и пристанїско за чамци, яхте и меньши ладї, та є идеалне место за любительох наутичного туризма.
Досц богати културно, уметнїцки и спортски живот, са численима манифестациями прикрашую Коцур.
“Мото скуп” традицийни и зазберує вельке число байкерох и залюбених до моторкох як зоз жеми, так и зоз иножемства.
“Коцурска жатва” манифестация на хторей свою роботу представяю руски уметнїцки дружтва, алє и дружтва других националних заєднїцох.
Тота манифестация содержи и провадзаци програмски цалосци попри промоцойох кнїжкох, вистави, етно кухнї.
Етно музей “Одняте од забуца”, содержи нїзки предметох, орудїя, алатох, та и писаних материялох хтори нам приблїжую и описую стари ремесла, обичаї и традицию Руснацох.
Збирка чишлї вецей як 2500 експонати, а найстарши датую зоз 18. вика.
Єдно зоз найактивнєйших руских културно уметнїцких дружтвох войводянских Руснацох праве у Коцуре и ноши мено “Жатва”.
Члени дружтва вредно пестую язик, традицию, културу и историю, та су и орґанизатори фестивала жридлового шпиваня под назву “Коцурска жатва”.
Од фестивалох Коцуре ище иснує и медзинародни фестивал гумора и сатири
“Коцурска чутка”.
Писателє Янко Фейса, Оскар Кочиш, Серафина Макаї, Серафина Медєши, Силвестер Макаї хтори творели на руским язику, познати професоре руского язика Юлиян Рамач, Гавриїл Надь, теолоґ Яков Кулич, фодбалер Любомир Фейса….
Шицки тоти чесни и вредни людзе народзени у Коцуре и одросли у стредку полного почитованя, приятельства и розликох хтори творя Войводину прекрасну яка є.
Шицко гевто зоз чим тоти людзе обогацели и обогацую швет, родзел Коцур, над хторим будни три турнї, три вири…и чуваю го.
Владимир Балащак
Leave a Reply