Скорей вецей як два децениї на инициятиву покойного священїка, нєзвичайно, прекрасного гласа, Йоакима Холошняя, сновани при парохиї хор под меном “Розанов”, до чиєй роботи оцец Йоаким уключел цалу свою фамелию.
Хор “Розанов” зоз своїм меном и роботу на афирмациї духовней музики чува благородне здогадованє на билоґардейского капетана Ивана Владимировича Розанова (1867-1942), хтори ше после Октобарскей револуциї приселєл до малого валалу Дюрдьов, нєдалєко од Нового Саду и ту сновал церковни хор 1920. року у хторим дириґовал полни два децениї.
Року 1993. формовани дзивоцки камерни состав под меном “Розанов”, же би 1996. року прероснул до мишаного хору и як таки дїйствує и нєшка, а перша дириґентка була Мария Холошняй.
Хор составени зоз шпивачох превасходно младшого возросту, екуменского характеру и у нїм зложно шпиваю грекокатолїки, православни, Серби и Руснаци.
Хор медзи иншим характеристични и по пестованю карпаторуского церковного шпиваня и вообще пестованю восточней церковно славянскей музики, а
його шпиванє у вецей гласи и виводзеня дїлую позитивно и змируюце на каждого.
Провадза Богослуженя и Литурґиї, наступаю у жеми и иножемстве.
Хор “Розанов” свойо виводзеня Крачунских литургийних шпиванкох, Крачунских, та Богослужбених шпиванкох ма зазначени на даскельо ношачох звука.
У будинку старей школи у Дюрдьове, находзи ше и чува се збирка предметох хтори хасновани у каждодньовим живоце Руснацох.
Збирка облапя коло тисяч историйни предмети, а окремне место забераю стари фотоґрафиї хтори походза зоз початку 20.вику.
Руске Културно-уметнїцке дружтво у Дюрдьове єдно з найактивнєйших и найвизначнєйших у Войводини, та зоз шицкима своїма секцями вредно чуваю и пестую национални идентитет Руснацох, поготов зоз своїм фестивалом жридлового шпиваня под назву “Най ше нє забудзе”.
Остатнї даскельо роки вельо и вредно ше робело на обнови храма, поставене зогриванє под патосом, на патос поставени нови мрамор, ограда хтора одзелює предню од заднєй часц церкви, храм обилєни, мури мальовани, поставени нови уходни дзвери, а тиж церкву прикрашую нови вирезбарени карсцелї.
Цала робота напредує дзекуюци нєсебичному даваню и велькей, нєвичерпююцей енерґиї оца Михаила Холошняя, хтори ше у роботи опера на свойо особни моци и любов своїх парохиянох.
Кед ше у Дюрдьове шицко тото злучи и нє треба же би чудовало же церква Родзеня Пресвятей Богородици ,“ Малогоспоїнска”, єдна з найкрасших и найушоренших у Войводини. На вельке задовольство и славу Богу.
Владимир Балащак
Leave a Reply